ថ្ងៃទី 04 ឧសភា 2012ម៉ោង 17:07:39
បន្ទាយមានជ័យៈ កាលពីរសៀលថ្ងៃទី៤ ខែឧសភា ឆ្នាំ២០១២ នៅសាលាស្រុកអារញ្ញ ខេត្តស្រះកែវ ប្រទេសថៃ អាជ្ញាធរខេត្តបន្ទាយមានជ័យ និងខេត្តស្រះកែវបានបើកកិច្ចប្រជុំពិសេសមួយដើម្បីរក ដំណោះស្រាយក្នុងការទប់ស្កាត់ពលករខ្មែរទៅធ្វើការនៅប្រទេសថៃ ខុសច្បាប់។កិច្ចប្រជុំពិភាក្សានេះ ភាគីកម្ពុជាចូលរួមដោយលោកទ្រី ណារិន្ទ អភិបាលរងខេត្តបន្ទាយមានជ័យ អភិបាលស្រុកតាមបណ្តោយព្រំដែនកម្ពុជា-ថៃទាំង៤ស្រុក កម្លាំងប្រដាប់អាវុធតាមបណ្តោយព្រំដែន ប្រធានគណៈកម្មការត្រួតពិនិត្យច្រកទ្វារអន្តរជាតិ និងប្រធានច្រកតំបន់។ ដោយឡែកភាគីថៃក៏មាន សមាសភាពចូលរួមដូចភាគីកម្ពុជាដែរ។
លោកទ្រី ណារិន្ទ អភិបាលរងខេត្តបន្ទាយមានជ័យបានថ្លែងថា ក្នុងកិច្ចប្រជុំនេះ ភាគីកម្ពុជាបានសំណូមពរដល់ភាគីថៃឲ្យជួយរកដំណោះស្រាយរួមគ្នា ដើម្បីទប់ស្កាត់ពលករ ខ្មែរចូលទៅធ្វើការនៅប្រទេសថៃខុសច្បាប់ ក្នុងនោះ១-សំណូមពរ បន្តទប់ស្កាត់ពលករខ្មែរចូលទៅធ្វើការនៅប្រទេសថៃខុសច្បាប់, ២-សំណូមពរភាគីថៃ និងការអនុគ្រោះ ឲ្យពលករខ្មែរចូលទៅធ្វើការនៅប្រទេសថៃ ទៅព្រឹក ត្រឡប់មកវិញល្ងាច ដោយកុំធ្វើទារុណកម្ម ឬបាញ់សម្លាប់ឲ្យសោះ, ៣-រាល់ពលករខ្មែរទៅធ្វើការនៅប្រទេសថៃខុសច្បាប់ បើថៃចាប់បាន កុំធ្វើទារុណកម្ម ឬបាញ់សម្លាប់ សូមបញ្ជូនមកកម្ពុជាវិញតាមផ្លូវច្បាប់ និង៤-បើថៃត្រូវការពលករខ្មែរទៅធ្វើការនៅថៃ សុំឲ្យអាជ្ញាធរធ្វើបណ្ណបញ្ជាក់ដើម្បីពលករខ្មែរធ្វើការស្របច្បាប់ ក្នុងប្រទេសថៃ។
លោកទ្រី ណារិន្ទបានឲ្យដឹងទៀតថា សំណូមពរទាំង៤ចំណុចខាងលើនេះ អាជ្ញាធរថៃមិនទាន់ឯកភាពនៅឡើយទេ តែបានអះអាងថានឹងនាំយកសំណូមពរទាំងអស់នេះជូនថ្នាក់លើសម្រេចជា បន្តទៀត។
គួរបញ្ជាក់ថា បច្ចុប្បន្ននេះ ភាពអត់ការងារធ្វើបានធ្វើឲ្យប្រជាពលរដ្ឋខ្មែរនៅតាមជាយដែនរាប់ ពាន់នាក់ ធ្វើចំណាកស្រុកទៅធ្វើការនៅប្រទេសថៃទាំងមានច្បាប់ និងខុសច្បាប់តាមច្រករបៀងនានាធ្វើឲ្យភាគី ថៃចាប់ធ្វើទារុណកម្ម និងបាញ់សម្លាប់ជាញឹកញាប់។ អំពើដ៏ឃោរឃៅនេះបានក្លាយជាក្តីកង្វល់របស់រាជ រដ្ឋាភិបាលកម្ពុជា និងបានជំរុញ អាជ្ញាធរតាមព្រំដែនឲ្យរកដំណោះស្រាយសមស្របជាមួយភាគីថៃ ដោយធ្វើយ៉ាងណាកាត់បន្ថយ លំហូរពលករធ្វើការនៅថៃងាកមកធ្វើការនៅក្នុងប្រទេសវិញ៕
