នៅក្នុងពិធីចុះហត្ថលេខាមួយរវាង លោកទៀ បាញ់ ឧបនាយករដ្ឋមន្រ្តី និងជារដ្ឋមន្រ្តីការពារជាតិកម្ពុជា ជាមួយលោកលាង កង់លី រដ្ឋមន្រ្តីការពារជាតិចិន កាលពីព្រឹកមិញ នៅឯទីស្តីការក្រសួងការពារជាតិក្នុងទីក្រុងភ្នំពេញ ប្រទេសចិនបានផ្តល់ជំនួយឥតសំណងចំនួន១២០លានយាន់ សម្រាប់ជួយដល់វិស័យកងទ័ពកម្ពុជា។
លោកនាយឧត្តមសេនីយ៍ ទៀ បាញ់ បាននិយាយប្រាប់ក្រុមអ្នកកាសែតក្រោយពិធីចុះហត្ថលេខាទទួលជំនួយនោះ ថា ប្រទេសចិនបានសម្រេចផ្តល់ជំនួយឥតសំណងចំនួន១២០ លានយាន់ សម្រាប់ការសាងសង់មន្ទីរពេទ្យយោធា និងសាលាបណ្តុះបណ្តាលយោធា។
ាភាគីចិនក៏សន្យាដែរថា នឹងទទួលយកមន្រ្តីយោធាកម្ពុជាទៅបណ្តុះបណ្តាលនៅប្រទេសចិនឲ្យបាន កាន់តែច្រើនឡើងថែមទៀត ដើម្បីក្លាយជាអ្នកបណ្តុះបណ្តាល ដល់យោធាកម្ពុជាបន្តទៀត។
ដោយឡែក ចំពោះបញ្ហាសមុទ្រចិនខាងត្បូងវិញ លោកទៀ បាញ់ បានឲ្យដឹងថា នៅថ្ងៃស្អែកទី២៩ ឧសភា លោកលាង កង់លី រដ្ឋមន្រ្តីក្រសួងការពារជាតិចិន គ្រោងនឹងជួបជាមួយរដ្ឋមន្រ្តីការពារជាតិអាស៊ាន ដើម្បីពិភាក្សាអំពីបញ្ហានេះ។
លោកលាង កង់លី រដ្ឋមន្រ្តីការពារជាតិចិន បានមកបំពេញទស្សនកិច្ចនៅកម្ពុជារយៈពេល៤ថ្ងៃ គឺស្របពេលមានកិច្ចប្រជុំរដ្ឋមន្រ្តីការពារជាតិអាស៊ាន ចាប់ផ្តើមនៅថ្ងៃទី២៩ ខែឧសភា ដែលកម្ពុជាធ្វើជាម្ចាស់ផ្ទះ ៕
