អ្នកនាំពាក្យក្រសួង ការបរទេសកម្ពុជានៅថ្ងៃសៅរ៍នេះ បានធ្វើការច្រានចោលចំពោះការថ្លែងរបស់អ្នកនាំពាក្យក្រសួង ការបរទេសថៃ គឺលោក ថានី ថោងភក្តី តាមរយៈកាសែតបាងកកប៉ុស្តិ៍ចេញផ្សាយនៅថ្ងៃទី០៤ ខែឧសភា ឆ្នាំ២០១២ ដែលចោទថា «កម្ពុជាបន្តការប្រឹងប្រែងដាក់គ្រាប់មីននៅតាមព្រំដែន ថៃ-កម្ពុជា»។
អ្នកនាំពាក្យក្រសួងការបរទេសថៃ ថានី ថោងភក្តី
សេចក្តីថ្លែងការណ៍បានបន្ត ទៀតថា វាជារឿងគួរឲ្យសោកសៅ និងរំជួលចិត្តខ្លាំងណាស់ ដែលកម្ពុជាត្រូវទទួលរងនូវការចោទប្រកាន់ដោយគ្មានមូលដ្ឋានបែបនេះ ខណៈដែលការផ្ទុះគ្រាប់មីនជាបញ្ហានៅកើតមានជារឿយៗ សូម្បីតែនៅកន្លែងដែលប្រជាជនបានទៅតាំងទីលំនៅ និងបង្កបង្កើនផលរាប់ឆ្នាំមកហើយក្រោយពីចប់សង្រ្គាម ក៏នៅមានគ្រាប់មីនផ្ទុះដែរ។
ជាមួយគ្នា កម្ពុជាសង្ឃឹមថា ប្រទេសថៃនឹងមិនធ្វើការចោទប្រកាន់ដោយគ្មានមូលដ្ឋានជាបន្តទៀតទេ ដែលវាអាចធ្វើឲ្យប៉ះពាល់ដល់ចំណងទំនាក់ទំនងកាន់តែប្រសើររវាង ប្រទេសទាំងពីរនេះ៕
