- Monday, 09 April 2012 07:05
បណ្ឌិត យ៉ង សាំងកុមារ ប្រធានអង្គការសេដាក មានប្រសាសន៍ថា ដើម្បីមានជីវភាពប្រសើរឡើង កសិករគួរផ្តោតលើការធ្វើអ្វី ដែលអាចធ្វើបាន ជាពិសេសការសន្សំ ៥យ៉ាង ដូចខាងក្រោមៈ
១. សន្សំជីធម្មជាតិៈ មានន័យថា ការប្រមែប្រមូលជាប្រចាំនូវកាកសំណល់រុក្ខជាតិ លាមកសត្វ និងដីមានជីជាតិ (ដីបាតបឹង ស្រះ ត្រពាំង ប្រឡាយ និងមមោកព្រៃ) ក៏ដូចជា ការសន្សំលាមកសត្វសំរាប់ឡជីវឧស្ម័ន។ ការមានជីធម្មជាតិប្រើច្រើន ធ្វើឱ្យផលដំណាំ របស់គាត់កាន់តែកើន ការចំណាយលើការទិញជី ពីខាងក្រៅ ត្រូវបានកាត់បន្ថយទាំងស្រុង។
២. សន្សំពូជ ជាពិសេស ការសន្សំពូជស្រូវជារៀងរាល់រដូវធ្វើឱ្យពូជកាន់តែសុទ្ធល្អ និងទិន្នផល ស្រូវកាន់តែកើន។
៣. សន្សំទឹក តាមរយៈការបង្កើនពាងទឹក ជីកស្រះ ត្រពាំងសំរាប់ស្តុកទឹកភ្លៀង ដែលចូលរួម ចំណែកកាត់បន្ថយពេលវេលាទៅរកទឹកពេលរដូវរាំងស្ងួតការ ទទួលបានទឹកគ្រប់គ្រាន់ សំរាប់ បរិភោគ ដាំបន្លែរួមផ្សំ និងចិញ្ចឹមសត្វ។
៤. សន្សំលុយៈ ចំណូលដែលរកបានមក ជាពិសេសតាមរយៈសកម្មភាពសន្សំជី សន្សំពូជ សន្សំទឹក ត្រូវបានដកយកទៅសន្សំសំរាប់បង្កើនទុនដោយអនុវត្តតាមគោលការណ៍សន្សំតាមមាន (មានច្រើនសន្សំច្រើន និងមានតិចសន្សំតិច)។
៥. សន្សំមិត្តៈ ការប្រមែប្រមូលអ្នកដែលមានចិត្តគំនិតស្រដៀងគ្នាចងក្រងជាក្រុម ឬសមាគម ដើម្បីជួយគ្នាទៅវិញទៅមក ជាពិសេស សន្សំប្រាក់រួមគ្នា ដើម្បីចែកគ្នាខ្ចី និងជំរុញការរៀនសូត្រពីគ្នាទៅវិញទៅមក។
សេដាក សូមអំពាវនាវឱ្យកសិករផ្តោតលើការសន្សំទាំង ៥យ៉ាង ដូចរៀបរាប់ខាងលើ។ ក្នុង រយៈពេល ៣-៥ ឆ្នាំ ក្រោយមក កសិករនឹងបានឃើញនូវជីវភាពរបស់អ្នកមានភាពល្អប្រសើរជាពុំខាន៕
