Wednesday, May 14, 2014
លោកផាន់សុផេងស្នងការនគរបាលកំពង់ធំមានដឹងរឿងអង្គភាពប្រឆាំងនិងអំពើពុករលួយចាប់អធិការស្រុកបន្ទាយមាសទេ?
កាលពីរសៀលថ្ងៃទី០៦ ខែឧសភា ឆ្នាំ២០១៤ប្រធានអង្គភាពប្រឆាំងអំពើពុករលួយលើកយកមកបង្ហាញ សាធារណជនតាមរយៈសន្និសីទសារព័ត៌មាន សំណុំរឿងបុករលួយចំនួន៤ទាកទងនិងការចាប់ខ្លួនអតីតអធិការស្រុកបន្ទាយមាស និងបក្ខពួក សំណុំរឿងអតីតប្រធានមន្ទីរសង្គមកិច្ច និងអតីតយុទ្ធជន យុវនីតិសម្បទាខេត្តតាកែវ សំណុំរឿងអតីតអគ្គាធិការនៃអគ្គាធិការដ្ឋានក្រសួងប្រៃសណីយ៍និង ទូរគមនាគមន៍ និងសំណុំរឿង ពួកHacke ។
ក្នុងចំណោមសំណុំរឿងដែលត្រូវ បានបង្ហាញមានករណីមួយគួរឲ្យចាបើអារម្មណ៍គឺករណីប្រព្រឹត្តអំពើពុករលួយរបស់លោកស្រ៊ុន ឡាំ អតីតអធិការស្រុកបន្ទាយមាស និងលោកម៉ុក ហ៊ត អធិការរងទទួលផែនសេនាធិការ ស្រុកបន្ទាយមាស ខេត្តកំពត ដែលបានឃុបឃិតគ្នាប្រព្រឹត្តអំពើពុករលួយ។
លោកអនុប្រធានអង្គភាពប្រឆាំងអំពើពុករលួយដែលជា អ្នកកាន់សំណុំរឿង បានធ្វើអត្ថាធិប្បាយឲ្យដឹងពីសកម្មភាពនៃជនប្រព្រឹត្តិ អំពើពុករលួយនៅក្នុងសំណុំរឿង លោក ស្រ៊ុន ឡាំ អតីតអធិការស្រុកបន្ទាយមាសខេត្តកំពត និងបក្ខពួកឈ្មោះ ម៉ុក ហ៊ត អតីតអធិការរងគឺត្រូវបានចោទប្រកាន់ចំនួន៩ករណី ដែលក្នុងនោះមានការកិបកេងប្រាក់មន្ត្រីនគរបាលបើកយកប្រាក់ខែរបស់ មន្ត្រីនគរបាលមិនមកធ្វើការ កិបកេងលុយសម្រាប់ឧបត្ថម្ភក្នុងយុទ្ធនាការឃោសនាបោះឆ្នោត សម្របសម្រួលបញ្ចប់ករណីបទល្មើសព្រហ្មទណ្ឌ បញ្ជាឲ្យកូនចៅប្រមូលលុយពីការងារសណ្ដាប់ធ្នាប់ រៀបចំកម្លាំងឲ្យទៅយកលុយពីអាជីវករទិញស្រូវនៅព្រំប្រទល់វៀតណាម ការប្រើប្រាស់អាវុធខុសច្បាប់ ការរារាំង ការស៊ើបអង្កេតរបស់អង្គភាពប្រឆាំងអំពើពុករលួយនិងករណីឆបោក។
នៅក្នុង សំណុំរឿងនេះលោក ស្រ៊ុន ឡាំ និងបក្ខពួកបានរកលុយពីអំពើពុករលួយនៅក្នុងសំណុំរឿងទាំងអស់បានចំនួន ២៥៧៤៤១២៣៥រៀល ព្រមទាំងករណីឆបោកក្រោយមួយទៀតនេះរកប្រាក់បានចំនួន១១៧៥០ដុល្លារ ហើយនៅក្នុងករណីនេះមានមន្ត្រីប៉ូលិសប្រមាណជាង២០នាក់បានជំរុញឲ្យ អង្គភាពប្រឆាំងអំពើពុករលួយស្វែងរកយុត្តិធម៌ឲ្យពួកគេ បើមិនដូច្នេះទេពួកគេនឹងទៅដោះខោអាវនៅមុខក្រសួងមហាផ្ទៃ ដូច្នេះករណីនេះគឺជាករណីមួយដ៏ធ្ងន់ធ្ងរដែលពួកគេបានប្រព្រឹត្តិ អំពើពុករលួយ។
អង្គភាពប្រឆាំងអំពើពុករលួយបានចាប់ខ្លួនលោកស្រ៊ុន ឡាំ (ឈ្មោះដើម សេង យាន) អធិការ និងលោកម៉ុក ហ៊ត អធិការរងទទួលផែនសេនាធិការ ស្រុកបន្ទាយមាស កាលពីថ្ងៃទី១៨ ខែមីនា ឆ្នាំ២០១៤ ហើយបន្ទាប់ពីធ្វើការសាកសួររួច អង្គភាពប្រឆាំងអំពើពុករលួយ ក៏បានបញ្ជូនខ្លួនមន្ត្រីប៉ូលិសទាំងពីរនាក់នេះ ទៅកាន់សាលាដំបូងខេត្តកំពត កាលពីថ្ងៃទី២០ ខែមីនា ឆ្នាំ២០១៤ ដើម្បីឲ្យព្រះរាជអាជ្ញាធរធ្វើការសាកសួរបន្ត និងចាត់ការទៅតាមនីតិវិធីច្បាប់។
ឥឡូវករណីដូចគ្នាត្រូវបានគេរកឃើញកើតមានស្រដៀងគ្នានៅក្នុងស្នងការដ្ឋាននគរបាលខេត្តកំពង់ធំ។លោក ផាន់ សុផេង បច្ចុប្បន្នជាស្នងការនគរបាលខេត្តកំពង់ធំអត្តលេខ០៤៩៥ ធ្លាប់ត្រូវបានក្រសួងមហាផ្ទៃចេញលិខិតព្រមានមួយច្បាប់ចុះថ្ងៃទី២៦ ខែវិច្ឆិកា ឆ្នាំ២០១៣ ដែលបញ្ជាក់ថាត្រូវបានអនុវត្តវិន័យដោយរូបភាពព្រមានចំពោះលោកឧត្តម សេនីយ៍ត្រី ផាន់ សុផេង ដោយមូលហេតុធ្វេសប្រហែសខ្វះការទទួលខុសត្រូវក្នុងការត្រួតពិនិត្យ មន្ត្រីបេឡានាំដល់ការយឺតយ៉ាវក្នុងការបើកផ្តល់ប្រាក់ឧបត្ថម្ភ យុទ្ធនាការឃោសនាបោះឆ្នោតក្រុមប្រឹក្សា ឃុំ-សង្កាត់ អាណត្តិទី៣ ឆ្នាំ២០១២ និងប្រាក់ឧបត្ថម្ភយុទ្ធនាការឃោសនាបោះឆ្នោតជ្រើសតាំងតំណាងរាស្ត្រ អាណត្តិទី៥ឆ្នាំ២០១៣ កន្លងទៅ ។
តាមរយៈលិខិត ដែលចុះហត្ថលេខាដោយលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃបានព្រមានឲ្យលោក ផង់ សុផេង ត្រូវកែប្រែនូវកំហុសឆ្គងខាងលើនិងអនុវត្តឲ្យបានត្រឹមត្រូវតាម វិន័យរបស់កងកម្លាំងនគរបាលជាតិ ហើយក្នុងករណីនៅតែប្រព្រឹត្តិកំហុសឆ្គងទៀតនោះនឹងត្រូវមានវិធានការ តាមផ្លូវច្បាប់ ។
ប្រភព ព័ត៌មានពីមន្ត្រីនគរបាលខេត្តកំពង់ធំបានឲ្យដឹងថា ក្រោយពីលោកឧបនាយករដ្ឋមន្ត្រី ស ខេង ចេញសេចក្តីប្រកាសព្រមានរួចហើយក៏ដោយក៏លោក ផាន់ សុផេង នៅតែមិនរាងចាល ហើយបន្តកិបកេងលុយឧបត្ថម្ភក្រៅម៉ោងដល់ប៉ុស្តិ៍ នគរបាលរដ្ឋបាលសម្រាប់ភូមិឃុំមានសុវត្ថិភាពឆ្នាំ២០១១និងឆ្នាំ២០១២ ដែលក្រសួងបានផ្តល់ឲ្យក្នុងមួយខែចំនួន១០ម៉ឺនរៀល សរុបទាំងអស់២៤ខែអស់រលីងតែម្តងបន្តទៀត ។
ប្រភព ខាងលើបានបញ្ជាក់ថាអំពើមិនប្រក្រតីខាងលើនេះត្រូវបាននគរបាល ថ្នាក់ក្រោមធ្វើការតវ៉ាតាមរយៈពាក្យបណ្តឹងមួយដែលក្រោយមកត្រូវ បែកធ្លាយដល់ដៃអ្នកសារព័ត៌មាន ។ បន្ទាប់ពី បែកធ្លាយរឿងអាស្រូវនោះលោក ផាន់ សុផេង បានកោះហៅមេប៉ុស្តិ៍ចំនួន៣ស្រុកគឺស្រុក សន្ទុក ស្រុកស្ទឹងសែន និងស្រុកកំពង់ស្វាយទៅបើកលុយនោះបានចំនួនមួយប៉ុស្តិ៍ ១.៤៧០.០០០ រៀល ហើយបានប្រាប់មេប៉ុស្តិ៍ថាលុយនេះអង្គភាពបានខ្ចីទុកសម្រាប់ត្រៀម ឧបត្ថម្ភដល់កងកម្លាំងទប់ទល់នឹងបាតុកម្មនិងកម្លាំងឈរជើងនៅតាម ព្រំដែន ។
មន្ត្រីនគរបាល និងកងកម្លាំងនគរបាលខេត្តកំពង់ធំបានចោទប្រកាន់លោកស្នងការរូបនោះ ថា នៅបន្តកិបកេងលុយរបបកងកម្លាំងដដែលបើទោះជារងការព្រមានពីលោក រដ្ឋមន្ត្រីក្រសួងមហាផ្ទៃក៏ដោយចុះ ។ ជាក់ស្តែងករណីខាងលើនេះលោក ផាន់ សុផេង បានបន្តកឹបកេងលុយឧបត្ថម្ភក្រៅម៉ោងដល់ប៉ុស្តិ៍នគរបាលរដ្ឋបាល សម្រាប់ភូមិឃុំមានសុវត្ថិភាពយ៉ាងពិតប្រាកដ ព្រោះថាប្រសិនបើគ្មានការតវ៉ាឬបណ្ដឹងពីថ្នាក់ក្រោមទេ ម្ល៉េះសមលោកស្នងការស៊ីដាច់លុយឧបត្ថម្ភនោះបាត់ទៅហើយ ។ ម្យ៉ាងទៀតការសម្រេចបើកប្រាក់ឧបត្ថម្ភខាងលើនេះបានតែចំនួន៣ស្រុក ប៉ុណ្ណោះ នៅខ្វះ៥ស្រុកទៀតមិនទាន់បានបើកនោះឡើយ ។
មន្ត្រីនគរបាលខេត្តកំពង់ធំ បានចោទប្រកាន់លោកស្នងការថាបាន ផ្គើនទៅនឹងបទបញ្ជាឬការព្រមានរបស់រដ្ឋមន្ត្រីក្រសួងមហាផ្ទៃដែល ឥរិយាបថបែបនោះមិនគ្រាន់តែមិនសក្តិសមជាថ្នាក់ដឹកនាំកងកម្លាំង ប៉ុណ្ណោះទេ ប៉ុន្តែក៏មិនមែនជាមន្ត្រីពិតប្រាកដរបស់រាជរដ្ឋាភិបាលផងដែរ ។ ទាក់ទងការចោទប្រកាន់ខាងលើនេះមាតុភូមិមិនទាន់អាចសុំការបំភ្លឺពីលោក ផាន់ សុផេង ស្នងការខេត្តកំពង់ធំនៅឡើយទេដោយសារតែទូរស័ព្ទលោកមិនអាចទំនាក់ទំនងបាន ៕, ដោយៈមាតុភូមិ