(ដោយ៖អ៊ិនសាមិត្តប៉ោយប៉ែត)៖ គ្រឿងផ្ទុះជាគ្រាប់រំសេវអាចប៉ះពាល់ដល់ជីវិតមនុស្សប្រមាណជាង២០០គីឡូក្រាម ត្រូវគេប្រទះឃើញចាក់ចោលកណ្តាលវាលស្រែ ស្ថិតក្នុងភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ កាលពីរសៀលថ្ងៃទី២៨ ខែកក្កដា ឆ្នាំ២០១២ ដោយសន្និដ្ឋានថា គឺជារបស់គយក្រុងប៉ោយប៉ែត។
តាមមន្រ្តីប៉ូលិសដែលពិនិត្យដល់ទីតាំងផ្ទាល់បានឲ្យដឹងថា គ្រឿងផ្ទុះដែលគេយកទៅចាក់ចោលនោះមានពីរប្រភេទ គឺប្រភេទទី១ ជាគ្រាប់រំសេវខ្នាតតូចប្រហាក់ប្រហែលទៅនឹងកាំជ្រួចសម្រាប់ដុតនៅរដូវបុណ្យទាន។ ចំណែកប្រភេទទី២ គឺជាគ្រាប់រំសេវធន់ធំ ដែលគេវេចខ្ចប់ដាក់ក្នុងបំពង់ជ័ររាប់សិបបំពង់។ ហើយជាមួយគ្នានោះ គេក៏រកឃើញផងដែរនូវមួក និងឯកសារមួយចំនួនរបស់មន្រ្តីគយក្រុងប៉ោយប៉ែតស្ថិតនៅជាមួយគ្រាប់ផ្ទុះទាំងនោះ។លោក ចេង ស អនុប្រធានការិយាល័យគយ និងរដ្ឋាករក្រុងប៉ោយប៉ែតបាននិយាយថា គ្រឿងផ្ទុះជារំសេវដែលគេបានរកឃើញនោះ គឺជារបស់គយក្រុងប៉ោយប៉ែតដែលបានរើរចេញពីបាតឃ្លាំង យកទៅបោះចោល ដើម្បីធ្វើឃ្លាំងថ្មី។
មតិសាធារណៈជនបានរិះគន់ថា គ្រាប់រំសេវផ្ទុះដែលអាចប៉ះពាល់ដល់ជីវិតមនុស្សរហូតដល់ទៅជាង២០០គីឡូក្រាម គួរតែគេកម្ទេចចោលតាមបច្ចេកទេសណាមួយ មិនគួរយកទៅបោះចោលកណ្តាលវាលដូច្នេះទេ។ ហើយទង្វើនេះ វាអាចបង្ហាញយ៉ាងច្បាស់ពីភាពគ្មានការទទួលខុសត្រូវ និងគិតគូរដល់អាយុជីវិតប្រជាពលរដ្ឋរបស់មន្រ្តីគយក្រុងប៉ោយប៉ែតផងដែរ៕