ភ្នំពេញ៖ ផ្ទះលក់ទូរស័ព្ទ ដូរលុយ វេរលុយ និងលក់មាសយីហោ ស៊ិន សាងអូន ដែលមានទីតាំងនៅផ្ទះលេខ C31 ភូមិ១៩ ក្រុម 42B សង្កាត់ស្រះចក ខណ្ឌដូនពេញ ត្រូវចោរប្លន់ប្រដាប់អាវុធ២នាក់ វាយបំបែកកញ្ចក់ទូប្រមូលយកលុយ និងគ្រឿងអលង្ការ មាស និងប្លាទីន សរុបជាទឹកប្រាក់ជាង១ម៉ឺនដុល្លារ នៅវេលាម៉ោង២និង១៥នាទីរសៀលថ្ងៃទី១២ ខែកក្កដា ឆ្នាំ២០១៣ ។
បើតាមម្ចាស់ផ្ទះឈ្មោះ ហេង គឹមស្រ៊ឺ ភេទប្រុស អាយុ៤៨ឆ្នាំ មុខរបរលក់ទូរស័ព្ទ ប្តូរលុយ វេរលុយ និងលក់មាស ស្នាក់នៅផ្ទះកើតហេតុខាងលើឲ្យដឹងថា មុនពេលកើតហេតុមានជនសង្ស័យ២នាក់អាយុប្រមាណជា៣០ឆ្នាំ ពាក់មួកការពារសុវត្ថិភាពនិងពាក់ម៉ាស់បិទមុខជិតទាំងពីរនាក់ ជិះម៉ូតូម៉ាកសេ១២៥ ស៊េរី២០០៩ ពណ៌ខ្មៅ អត់ចាំស្លាកលេខ មួយគ្រឿង ទៅឈប់នៅមុខហាងលក់ទូរស័ព្ទរួចដើរចូលទៅក្នុងផ្ទះ ក្នុងនោះជនសង្ស័យម្នាក់ពាក់អាវពណ៌លឿងដៃវែងកាន់ញញួរនៅនឹងដៃ ចំណែកជនសង្ស័យម្នាក់ទៀតពាក់អាវពណ៌សដៃវែង ប្រដាប់ដោយកាំភ្លើងខ្លីមួយដើម ដើរចូលទៅភ្ជង់ម្ចាស់ផ្ទះហើយយកញញួរវាយបំបែកកញ្ចក់ទូលក់ មាស និងប្តូរលុយធ្វើឲ្យបែកខ្ចាយហើយប្រមូលយកប្រាក់ចំនួន១០លានរៀល មាស២ម្លឹង និងប្លាទីន២តម្លឹង និងប្រាក់ដុល្លារមួយចំនួនទៀត គិតជាប្រាក់សរុបទាំងអស់ជាង១ម៉ឺនដុល្លារ។
គួរបញ្ជាក់ផងដែរថា ករណីប្លន់ប្រដាប់អាវុធនេះ មិនមានការផ្ទុះអាវុធធ្វើឲ្យម្ចាស់ផ្ទះ រងរបួសទេ គ្រាន់តែភ្ជង់គំរាមប្លន់យកទ្រព្យសម្បត្តិតែប៉ុណ្ណោះ ។ ខណៈពេលជនសង្ស័យធ្វើសកម្មភាពប្លន់យកលុយនិងគ្រឿងអលង្កាបានហើយ ជនសង្ស័យ បានជិះម៉ូតូគេចទៅបាត់ ទើបម្ចាស់ផ្ទះបានប្តឹងទៅសមត្ថកិច្ចចុះទៅស្រាវជ្រាវនៅផ្ទះកើតហេតុ ខាងលើនិងឆែកមើលតាមកាមេរ៉ាសុវត្ថិភាពរួចរាល់ហើយ ។
កម្លាំងសមត្ថកិច្ចកំពុងស្រាវជ្រាវ និងតាមរុករកជនសង្ស័យដែលមានភិនភាគដូចក្នុងកាម៉េរ៉ាសុវត្ថិភាពដើម្បី យកមកផ្តន្ទាទោសតាមច្បាប់ ៕
