ដោយ: មុនីរាជ
ភ្នំពេញ: លោក ហោ ណាំហុង ឧបនាយករដ្ឋមន្ត្រី រដ្ឋមន្ត្រីការបរទេស បានប្រកាសថា ការលើកលែងដល់លោក សម រង្ស៊ី មិនមានការគាបសង្កត់ពីបរទេសណាទេ។ នេះជានយោបាយរបស់គណបក្សប្រជាជនកម្ពុជា ពិសេសសម្តេចហ៊ុនសែន ក្នុងស្មារតីបង្រួបបង្រួមជាតិ។
លោកឧបនាយករដ្ឋមន្ត្រី ហោ ណាំហុង បានមានប្រសាសន៍ថា លោកបានជួបជាមួយភារៈធារីស្ថានទូតសហរដ្ឋអាមេរិក ដើម្បីប្រគល់លិខិតរបស់សម្តេចអគ្គមហាសេនាបតីតេជោ ហ៊ុន សែន ថ្វាយព្រះករុណាព្រះមហាក្សត្រ ដើម្បីសុំឲ្យព្រះមហាក្សត្រ លើកលែងទោសឲ្យលោក សម រង្ស៊ី និងព្រះរាជក្រឹត្យលើកលែងទោស ជូនទៅលោកភារៈធារីសហរដ្ឋអាមេរិក។
លោក ហោ ណាំហុង បានបញ្ជាក់ជូនថា នេះមិនមែនជាលើកទី១ទេ ដែលសម្តេចតេជោ បានសូមឲ្យព្រះមហាក្សត្រលើកលែងទោសលោក សម រង្ស៊ី។
លោកឧបនាយករដ្ឋមន្ត្រី ហោ ណាំហុង បានបញ្ជាក់ថា “ប្រការនេះក៏បញ្ជាក់ឲ្យឃើញនូវនយោបាយរបស់គណបក្សប្រជាជនកម្ពុជា ជាពិសេសរបស់សម្តេចតេជោ ហ៊ុន សែន ចំពោះការបង្រួបបង្រួមជាតិ”។
លោក ហោ ណាំហុង បានលើកឡើងថា កាលពីឆ្នាំ១៩៨៧ គណបក្សប្រជាជនកម្ពុជា និងសម្តេចតេជោ ហ៊ុន សែន ពេលនោះ ក៏បានយកគំនិតផ្តួចផ្តើមចរចាជាមួយព្រះវររាជបិតាព្រះបរមរតនកោដ្ឋ ដែលពេលនោះ ជាប្រធានរដ្ឋាភិបាលចម្រុះត្រីភាគីរបស់កម្ពុជាប្រជាធិបតេយ្យ ដើម្បីបង្រួបបង្រួមជាតិ ហើយបានឈានដល់កិច្ចព្រមព្រៀងទីក្រុងប៉ារីសឆ្នាំ១៩៩១។
លោក ហោ ណាំហុង បានបន្តថា មិនយូរប៉ុន្មាន ប៉ុន្មានឆ្នាំទៅនេះ នៅខែវិច្ឆិកា ឆ្នាំ១៩៩៨ សម្តេចតេជោ ហ៊ុន សែន ក៏យកគំនិតផ្តួចផ្តើមចេញនូវនយោបាយឈ្នះ ឈ្នះ ដែលឈានដល់ការរលំរលាយទាំងស្រុង នៃចលនាកម្ពុជាប្រជាធិបតេយ្យ ទាំងនយោបាយ ទាំងយោធា ហើយឈានដល់ការចុះចូលរបស់កម្ពុជាប្រជាធិបតេយ្យ ឈានដល់ការបង្រួបបង្រួមជាតិជាថ្មីម្តងទៀត ឯកភាពជាតិជាថ្មីម្តងទៀត។
លោកប្រមុខការទូតកម្ពុជា ហោ ណាំហុង បានបន្តទៀតថា នេះបង្ហាញឲ្យឃើញថា នយោបាយរបស់គណបក្សប្រជាជនកម្ពុជា របស់សម្តេចតេជោ ហ៊ុន សែន ជានិច្ច ជាកាល ប្តេជ្ញាធ្វើយ៉ាងណាឲ្យមានការបង្រួបបង្រួមជាតិ ឲ្យមានការឯកភាពជាតិ។ ជាពិសេសក្នុងពេលឥឡូវនេះ ពេលលើកលែងទោសឲ្យលោក សម រង្ស៊ី ដើម្បីឈានដល់ការបោះឆ្នោតដោយសេរី ត្រឹមត្រូវ ប្រជាធិបតេយ្យ។ នេះជាការប្តេជ្ញាចិត្តរបស់សម្តេចតេជោ ហ៊ុន សែន ឈានដល់ការបោះឆ្នោត ដោយប្រជាធិបតេយ្យ ត្រឹមត្រូវ និងដោយយុត្តិធម៌។
លោក ឧបនាយករដ្ឋមន្ត្រី ហោ ណាំហុង ក៏បានបញ្ជាក់ជូនភារៈធារីស្ថានទូតសហរដ្ឋអាមេរិកថា “ប្រការទាំងអស់នេះ សបញ្ជាក់ឲ្យឃើញថា កម្ពុជា គណបក្សប្រជាជនកម្ពុជា សម្តេចតេជោ ហ៊ុន សែន ដឹងច្បាស់ណាស់ តើត្រូវដោះស្រាយបញ្ហារបស់ខ្លួន យ៉ាងម៉េច? ត្រូវដោះស្រាយការបង្រួបបង្រួមជាតិ យ៉ាងម៉េច? ត្រូវធ្វើឲ្យការបោះឆ្នោតដោយប្រជាធិបតេយ្យ សេរី និងយុត្តិធម៌ យ៉ាងម៉េច? មិនចាំបាច់មានអន្តរាគមន៍ពីបរទេសទេ។ មិនចាំបាច់មានមេរៀនពីបរទេសទេ។ យើងចេះធ្វើខ្លួនឯង យើងចេះម្ចាស់ការខ្លួនឯង”។
ប្រមុខការទូតកម្ពុជា លោក ហោ ណាំហុង ក៏បានអំពាវនាវទៅកាន់អាមេរិកថា “សូមឲ្យរដ្ឋាភិបាលអាមេរិក មានទស្សនៈ ដោយមានការថ្លឹងថ្លែងអំពីការពិតនៅកម្ពុជា។ កុំមើលមកកម្ពុជា តាមរយៈសារព័ត៌មានប្រឆាំង!។ កុំមើលមកកម្ពុជា តាមរយៈគណបក្សប្រឆាំង!។
ជាការឆ្លើយតប លោក Jeff Diagle ភារៈធារីស្ថានទូតសហរដ្ឋអាមេរិក ក៏បានជម្រាបជូនលោកឧបនាយករដ្ឋមន្ត្រី ហោ ណាំហុង ថា កាលពីថ្ងៃទី១២ ខែកក្កដា ឆ្នាំ២០១៣ អ្នកនាំពាក្យរបស់ក្រសួងការបរទេសអាមេរិក ក៏បានស្វាគមន៍នូវការលើកលែងទោសរបស់លោក សម រង្ស៊ី។ នេះបើតាមការលើកឡើងរបស់លោកឧបនាយករដ្ឋមន្ត្រី ហោ ណាំហុង។
លោកឧបនាយករដ្ឋមន្ត្រី ហោ ណាំហុង បានបញ្ជាក់ថា ការស្នើរបស់សម្តេចតតេជោ ហ៊ុន សែន ទៅព្រះមហាក្សត្រ ដើម្បីលើកលែងទោសលោក សម រង្ស៊ី មានការស្វាគមន៍ពីមជ្ឈដ្ឋានអន្តរជាតិទាំងអស់។
កិច្ចប្រជុំរវាងប្រមុខការទូតកម្ពុជា និងអ្នកការទូតអាមេរិក នៅព្រឹកនេះ ក៏បានធ្វើឡើង តែមួយថ្ងៃប៉ុណ្ណោះ បន្ទាប់ពីលោកសមរង្ស៊ី ត្រូវបានព្រះមហាក្សត្រ ព្រះរាជប្រទានការលើកលែងទោស តាមសំណើរបស់សម្តេចហ៊ុនសែន កាលពីថ្ងៃទី១២ ខែកក្កដា ឆ្នាំ២០១៣៕CEN