រាជធានីភ្នំពេញ៖ ជនសង្ស័យ៣នាក់ កាំភ្លើងខ្លី២ដើម និងម៉ូតូ២គ្រឿង ត្រូវបានកម្លាំងនគរបាលខណ្ឌសែនសុខ ធ្វើការឃាត់ខ្លួនពីបទប្រើប្រាស់អាវុធខុសច្បាប់ (គ្មានលិខិតអនុញ្ញាត) នៅចំណុចស្ថានីយប្រេងឥន្ធនៈកាល់តិចពេទ្យលោកសង្ឃ ស្ថិតក្នុងភូមិត្រពាំងឈូក សង្កាត់ទឹកថ្លា ខណ្ឌសែនសុខ
កាលពីវេលាម៉ោងវេលាម៉ោង១រំលងអធ្រាត្រឈានចូលថ្ងៃទី១៦ កក្កដា ។
នគរបាលខណ្ឌសែនសុខបានឲ្យដឹងថា នៅវេលាម៉ោងខាងលើកម្លាំងនគរបាលខណ្ឌកំពុងល្បាតក្នុងភូមិសាស្រ្តខាងលើ ប្រទះឃើញជនសង្ស័យ៣នាក់ ជិះម៉ូតូ២គ្រឿង ក្នុងនោះ២នាក់ ជិះម៉ូតូសេ១២៥ ស៊េរី២០១២ ពណ៌ខ្មៅ ពាក់ស្លាកលេខ ភ្នំពេញ 1BJ 6465 និងម៉ូតូគ្រឿងទៀតម៉ាកស្មាស ស៊េរី២០១៣ ពណ៌ក្រហម អត់ស្លាកលេខ ។
ម៉ូតូទាំងពីរគ្រឿងខាងលើនេះ បានឈប់និយាយគ្នានៅមុខស្ថានីយប្រេងឥន្ធនៈកាល់តិចពេទ្យលោកសង្ឃ គួរឲ្យសង្ស័យ ទើប នគរបាលខណ្ឌសែនសុខធ្វើការឃាត់ត្រួតពិនិត្យឃើញមានកាំភ្លើងខ្លី២ដើម ម៉ាកកា៥៤ និងម៉ាកកា៥៩ មិនមានលិខិតអនុញ្ញាតិត្រឹមត្រូវ ទើបធ្វើការឃាត់ខ្លួនបញ្ជូនទៅអធិការដ្ឋានខណ្ឌសែនសុខ ។
ជនសង្ស័យទី១ មានឈ្មោះ យឹម រាវី ភេទប្រុស អាយុ២៣ឆ្នាំ មុខរបរកងរាជអាវុធហត្ថលើផ្ទៃប្រទេស មានទីលំនៅស្រុកកណ្តាលស្ទឹង ខេត្តកណ្តាល
២ ឈ្មោះ យ៉ែម សុខី ភេទប្រុស អាយុ២៣ឆ្នាំ មុខរបរយោធា មានទីលំនៅសង្កាត់ក្រាំងធ្នង់ ខណ្ឌពោធិ៍សែនជ័យ និង៣ ឈ្មោះ ភិន ភ័ក្រ្ត ភេទប្រុស អាយុ២៣ឆ្នាំ មុខរបរកងរាជអាវុធហត្ថលើផ្ទៃប្រទេស មានទីលំនៅស្រុក ឧដុង្គ ខេត្តកំពង់ស្ពឺ ជាម្ចាស់ម៉ូតូស្មាសវី អត់ស្លាកលេខ ត្រូវបានដោះលែងវិញហើយ ។
ជនសង្ស័យ២នាក់ កាំភ្លើងខ្លី២ដើម និងម៉ូតូ២គ្រឿង ត្រូវបាននគរបាលខណ្ឌសែនសុខកសាង សំណុំរឿងបញ្ជូនទៅទីបញ្ជាការដ្ឋានកងរាជអាវុធហត្ថរាជធានីភ្នំពេញ ដើម្បីចាត់ការតាមច្បាប់៕akt