ផាក់ ស៊ាងលី
ភ្នំពេញ ប៉ុស្តិ៍
ប្រជាពលរដ្ឋជួបប្រជុំនៅកណ្តាលព្រៃសហគមន៍ដុងបេង ក្នុងឃុំបេង ស្រុកបន្ទាយអម្ពិលកន្លងមក។ រូបថត សហការី
ឧត្តរមានជ័យៈ ប្រជាសហគមន៍ព្រៃឈើបានឲ្យដឹងថា
យ៉ាងហោចណាស់ដីព្រៃសហគមន៍ជិត ៤០០០ ហិកតា ស្ថិតនៅក្នុងឃុំបេង
ស្រុកបន្ទាយអំពិល ខេត្តឧត្តរមានជ័យ
កំពុងត្រូវបានកាន់កាប់និងឈូសឆាយយកដីលក់យ៉ាងអនាធិបតេយ្យ
ពីសំណាក់ក្រុមយោធា និងអ្នកមានអំណាច។លោក ឌិន ហេងប្រធានសហគមន៍ព្រៃឈើអណ្តូងបរ បានឲ្យដឹងថា សហគមន៍ព្រៃឈើអណ្តូងបរ និងដុងបេង ស្ថិតនៅក្នុងឃុំ បេង ស្រុកបន្ទាយអំពិលកំពុងត្រូវបានចូលបោះទីតាំង និងកាប់ឆ្ការឈូសឆាយលក់ដោយក្រុមទាហាន និងប្រជាពលរដ្ឋមកពីខេត្តបន្ទាយមានជ័យ។
លោកបានថ្លែងថា៖«សហគមន៍យើងអស់ទឹកចិត្តថែរក្សាហើយ យើងក៏គ្មានអំណាចអីទៅទប់ស្កាត់គេទេ មានតែរាយការណ៍ទៅរដ្ឋបាលព្រៃឈើប៉ុណ្ណោះ។ព្រៃឈើនឹងវិនាសមិនខាន ឡើយ»។
លោកបានបន្តថាប្រជាសហគមន៍បាន ចាប់ផ្តើមធ្វើការថែរក្សា ព្រៃសហគមន៍អណ្តូងបរ៦១១៤ហិកតាចាប់តាំងពីឆ្នាំ២០០៤មក បន្ទាប់ពីក្រសួងកសិកម្មប្រកាសទទួលស្គាល់ និងមានកិច្ចសន្យាការពាររវាងប្រជាសហគមន៍ និងខណ្ឌរដ្ឋបាលព្រៃឈើ។
លោកជូន សុភណ្ឌលេខាសហគមន៍ព្រៃឈើដុងបេងក៏បានអះអាងថាព្រៃសហគមន៍ដុងបេងតែង ត្រូវបានក្រុមយោធាចូលមកបោះទីតាំងស្ទើរគ្រប់ទីកន្លែង ទាំងអស់ ហើយថែមទាំងជួលត្រាក់ទ័រ និងអេស្កាវ៉ាតទ័រ ម៉ាស៊ីនអារឈើប្រមាណជា១០គ្រឿងឈូសឆាយ និងកាត់ដើមឈើយកទៅលក់ឲ្យពលរដ្ឋអស់ប្រហែលជា៤០ហិកតាហើយ។ លោកបានថ្លែងថា៖«ទាហានបានកាប់ឆ្ការដីព្រៃលក់ឲ្យពលរដ្ឋតម្លៃ១៥០ ដុល្លារក្នុងមួយហិកតា»។
លោកសារ ខ្លៃប្រធានបណ្តាញសហគមន៍ព្រៃឈើខេត្តឧត្តរមានជ័យបានអះអាងថា សហគមន៍ព្រៃឈើអណ្តូងបរ និងដុងបេងត្រូវបានយោធាកងពលលេខ៤ លេខ៥ និងកងពលថ្មើរជើងលេខ២ចូលបោះទីតាំង ហើយកាន់កាប់ស្ទើរទាំងអស់ទៅហើយ។ លោកបានបញ្ជាក់ថា៖«តាមពិតទាហានត្រូវការដីតែ២៦០០ហិកតាទេ តែដោយសារតែដីរដ្ឋត្រូវបានគេលក់អស់ ទើបចូលមកបោះទីតាំងក្នុងដីសហគមន៍វិញ»។
លោក រឹត បូរ ប្រធានកម្មវិធីរបស់សហគមន៍អភិវឌ្ឍន៍កុមារ(CDA)ដែលផ្តល់មូលនិធិជួយ អភិវឌ្ឍន៍សហគមន៍ និងឧបត្ថម្ភសហគមន៍ក្នុងការចុះល្បាតសហគមន៍ព្រៃឈើបានឲ្យដឹងថា ក្រុមទាហានបានចូលទៅកាន់កាប់ក្នុងព្រៃសហគមន៍ទាំងពីរ។ អង្គការលោកបានជួយប្រជាសហគមន៍ឲ្យដាក់ជាពាក្យបណ្តឹងទៅរដ្ឋបាល ព្រៃឈើ អាជ្ញាធរនិងស្ថាប័នរដ្ឋាភិបាលមួយចំនួន ប៉ុន្តែមិនមានដំណោះស្រាយទេ។ លោក បានបញ្ជាក់ថា៖«យើងមានការសោកស្តាយពីព្រោះទាំងសហគមន៍ និងអង្គការខ្ញុំជួយការពារព្រៃរហូតមក»។
លោក ហ៊ីង ហឿន អភិបាលរងស្រុកបន្ទាយអំពិលបានមានប្រសាសន៍ថាកងយោធាពិតជាមាន បោះទីតាំងនៅក្នុងព្រៃសហគមន៍នោះមែន បន្ទាប់ពីមានបញ្ហាជាមួយប្រទេសជិតខាង។ លោកបានថ្លែងថា៖«នេះជាបញ្ជារបស់រដ្ឋាភិបាលឲ្យបោះទីតាំងនៅក្នុង ព្រៃ ហើយជាធម្មតាពេលយោធាទៅទីណាតែងតែមានគ្រួសារ។ វាមានផលប៉ះពាល់ខ្លះដល់ព្រៃឈើ រដ្ឋក៏មានដីខ្លះសម្រាប់គ្រួសារកងទ័ពនៅជិតព្រៃសហគមន៍ដែរ»។
ពុំអាចធ្វើការទាក់ទងយោធាកងពលលេខ៤ លេខ៥ និងកងពលថ្មើរជើងលេខ២ដើម្បីធ្វើការអត្ថាធិប្បាយបានទេកាលពីថ្ងៃ ម្សិលមិញ៕
