ព្រៃវែង៖ តាមការឲ្យដឹងពីមន្រ្តីប៉ូលីសចរាចរណ៍នៃស្នងការដ្ឋាន នគរបាលខេត្តថា ក្នុងរយៈពេល១ខែគិតចាប់ ពីថ្ងៃទី១១ ខែមិថុនា រហូតដល់ថ្ងៃទី១០ ខែកក្តដា ឆ្នាំ២០១៣ នៅក្នុងទឹកដីខេត្តព្រៃវែង បានកើតមានហេតុការណ៍ គ្រោះថ្នាក់ចរាចរណ៍ចំនួន២០លើក
ដែលបានបណ្តាលឲ្យមនុស្សស្លាប់ចំនួន៨នាក់ ក្នុងនោះស្រី១នាក់ និងរងរបួសធ្ងន់ស្រាលចំនួន៤២នាក់ ក្នុងនោះស្រី៨នាក់។ បើប្រៀបធៀបទៅនឹងរយៈពេលដូចគ្នាកាលពីខែកន្លងទៅឃើញថា ចំនួនគ្រោះថ្នាក់បានកើនឡើងចំនួន១៣លើក ស្មើនឹង១៨% ចំនួនអ្នករបួសកើនឡើង២១នាក់ស្មើនឹង១០០% រីឯចំនួនមនុស្សស្លាប់មានការកើនឡើងចំនួន២នាក់ ស្មើនឹង៣៣%។
នៅក្នុងហេតុការណ៍គ្រោះថ្នាក់ចរាចរណ៍ទាំង២០ករណីនេះ បានបណ្តាលឲ្យមានការខូចខាតរថយន្ត ចំនួន១១គ្រឿង ម៉ូតូចំនួន១៦គ្រឿង និងយានផ្សេងៗចំនួន៤គ្រឿង។ ប្រភពពត៌មានពីការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តបានឲ្យដឹងថា ហេតុការណ៍គ្រោះថ្នាក់ចរាចរណ៍ទាំងនេះ គឺបណ្តាលមកពី ការបើកបរហួសល្បឿនកំណត់ចំនួន១៦ករណី បើកបរប្រជែងគ្នាបណ្តាលអោយមានគ្រោះថ្នាក់២ករណី បើកបរដោយធ្វេសប្រហែស១ករណី និងកត្តាយានយន្ត១ករណី។
បច្ចុប្បន្ននេះមន្រ្តីការិយាល័យចរាចរណ៍ខេត្តបានធ្វើការដោះស្រាយចប់បានចំនួន១៤ករណី បញ្ជូនទៅតុលាការខេត្ត១ករណី នៅសល់៥ករណីទៀតកំពុងធ្វើការដោះស្រាយ។ ចំពោះបញ្ហាប្រឈមដែលនៅតែកើតមាន គឺប្រជាពលរដ្ឋភាគច្រើននៅតែមិនព្រមចូលរួមគោរពច្បាប់ចរាចរណ៍ ការបើកបរនៅតែប្រើប្រាស់ល្បឿនលឿនហួសកំណត់ មិនគោរពសិទ្ធិអាទិភាព បើកបរមិនពាក់មួកសុវត្ថិភាព មិនដាក់កញ្ចក់មើលក្រោយ ជាពិសេសការបើកបរនៅក្នុងស្ថានភាពស្រវឹង ។angkorthom
