ដោយ ៖ ព្រាប១ ថ្ងៃទី 27 កញ្ញា 2012ម៉ោង 18:11:02
ខេត្ដឧត្ដរមានជ័យ ៖ រថយន្ដកាមរីឆ្លាម១គ្រឿង ពណ៌ស្លែ ពាក់ស្លាកលេខភ្នំពេញ 2C-8916 ដែលគេដឹងជាកម្មសិទ្ធិ របស់មន្ដ្រីសង្កាត់រដ្ឋបាលព្រៃឈើអន្លង់វែង ខេត្ដឧត្ដរមានជ័យ ត្រូវបានជនមិនស្គាល់មុខលួចចូលវាយបំបែកកញ្ចក់ ទាំងអស់ ខណៈដែលរថយន្ដនោះត្រូវម្ចាស់ចតទុកក្នុងបរិវេណស្នាក់ការសង្កាត់រដ្ឋបាលព្រៃឈើអន្លង់វែង ឋិតក្នុងភូមិ អណ្ដូង៣ ឃុំ-ស្រុកអន្លង់វែង ខេត្ដឧត្ដរមានជ័យ មិនដឹងជាកើតហេតុទាំងពេលណាទេ លុះដល់ព្រឹកថ្ងៃទី២៧ ខែកញ្ញា ឆ្នាំ២០១២ ទើបដឹងរឿង ។
លោក ចំរើន ដែលជាម្ចាស់រថយន្ដត្រូវជនមិនស្គាល់មុខវាយខ្ទេចកញ្ចក់ បានរៀបរាប់ប្រាប់នគរវត្ដឱ្យដឹងថា មុនពេល កើតហេតុលោកបានយករថយន្ដចតទុកនៅក្នុងបរិវេណសង្កាត់រដ្ឋបាលព្រៃឈើ រួចហើយក៏ឡើងជិះរថយន្ដតាក់ស៊ីទៅ លេងស្រុកនៅស្រុកចំការលើ ខេត្ដកំពង់ចាម លុះព្រឹកឡើងត្រូវបានមិត្ដភក្ដិធ្វើការជាមួយទូរស័ព្ទប្រាប់ថា រថយន្ដរបស់ លោកត្រូវជនមិនស្គាល់មុខវាយខ្ទេចកញ្ចក់អស់ហើយ ។ ពេលឮមិត្ដភក្ដិប្រាប់បែបនេះ ក៏ស្រឡាំងកាំងក្នុងចិត្ដ ហើយ គិតថា តើអ្នកណាថ្លើមធំហ៊ានចូលលួចចូលវាយបំបែកកញ្ចក់រថយន្ដរបស់លោកនៅក្នុងសង្កាត់រដ្ឋបាលព្រៃឈើបែប នេះ ? ព្រោះលោកមិនដែលមានគំនុំជាមួយអ្នកណាម្នាក់ផងនោះ ។
ជុំវិញករណីនេះ មានមតិមួយចំនួនលើកឡើងថា អាចបណ្ដាលមកពីការបំពេញការងាររបស់មន្ដ្រីរដ្ឋបាលព្រៃឈើរូប នោះធ្វើឱ្យប៉ះពាល់មុខជំនួញរកស៊ីខុសច្បាប់របស់ឈ្មួញណាមួយហើយមើលទៅ ។
គួរបញ្ជាក់ថា កន្លងមក ករណីស្រដៀងគ្នានេះបានកើតមានម្ដង ដោយជនមិនស្គាល់មុខបាញ់១គ្រាប់ទៅលើរថយន្ដរបស់មន្ដ្រីអង្គការបរិស្ថាន បណ្ដាលឱ្យធ្លុះដំបូល ហើយពេលនេះក៏មានការវាយបំបែកកញ្ចក់រថយន្ដមន្ដ្រីរដ្ឋបាលព្រៃឈើកើតឡើងទៀត ។ ចំពោះករណីនេះសមត្ថកិច្ចមិនទាន់កំណត់មុខសញ្ញាជនបង្កបាននៅឡើយទេ ៕
